先講美銀，據外電報道，佢哋眼見個商品市場咁旺，有意喺未來兩至三年將金屬及能源部擴大25%；據佢哋嘅環球商品主管David Goodman講，美銀已經喺中國、新加坡、印度及日本請咗人。知情人士透露，依家個商品組有600人。

財管花紅狂加碼

咁旗下嘅美林又點呢？早前因為豪派花紅而畀納稅人鬧到暈嘅美林，就用大大舊嘅花紅吸引人才。據報道，美林嘅「卜架」人數由合併前嘅1.8萬人，去到六月得番1.5萬人，佢哋為咗吸納高級顧問就加大花紅，環球財富管理嘅花紅可多至過去一年貢獻嘅140%，如果未來5年可達到一啲更進取嘅盈利目標，仲加碼多200%添，仲高過○七年牛市嗰時！

余絲韻