本文重點
行將退休嘅金管局總裁任志剛，出席活動買少見少，不過下周一佢會出席主持滙豐中國零售人民幣債券嘅發行儀式，大家又有機會睇到佢嘅風采，同場嘅仲有一眾滙豐高層，不過滙豐銀行執行董事王冬勝就放緊假，唔會出席。
賀港銀內地子行發債
任總帶親銀行公會訪京，總離不開為香港爭取更多人民幣業務。佢老人家呢幾年更經常將爭取增加在港發行人債嘅發債體成日掛喺嘴邊。講咗咁多年，今年終於見到香港銀行喺內地註冊嘅子行能夠在港發行人債，任總點會唔到場賀一賀呢？
屈指一算，滙豐呢隻人債好可能係任總首次，亦是任內最後一次到場親證香港銀行喺內地註冊嘅子行來港發人債，之後就要喺其他公開場合先見到任總，包括嚟緊九月舉行主研國際金融形勢嘅SIBOS論壇。
今次發行人債嘅主禮嘉賓當然唔少得主人家份，包括有滙豐亞太區兼滙豐中國主席鄭海泉、滙豐中國行長兼行政總裁翁富澤等，仲有前排幫滙豐中國手，發人債予機構投資者嘅中信集團董事長孔丹。
余絲韻