本文重點
香港同台灣嘅ETF成功互相跨境上市，其中一個最開心嘅人，當然係證監會副行政總裁兼執行董事張灼華，因為佢有份一手湊大呢個項目。
出席港ETF「登台」儀式
張灼華日前就為咗呢個Baby風塵僕僕，佢啱啱喺星期四先陪同財經事務及庫務局局長陳家強，率領本港金融界到上海訪問，見過當地唔少領導，到周五即係尋日嘅早上，佢已現身台灣證券交易所，出席首兩隻香港ETF喺台灣上市嘅儀式，真係來去匆匆。
張灼華喺上市儀式時就講到，佢真係好高興見證香港ETF喺台灣上市，呢個唔單止係香港同台灣喺金融合作方面嘅重要一步，更標誌着內地、香港同台灣三地市場，透過香港呢道橋樑得以真正聯繫起來。
喺台灣嘅上市儀式，同香港真係好唔同，見到幾個嘉賓好似張灼華、港交所（00388）行政總裁周文耀、恒生銀行（00011）副董事長兼行政總裁梁高美懿、台灣交易所董事長薛琦等一齊敲打鑼鼓，慶祝上市，氣氛比香港熱鬧好多呢！
余絲韻