金管局尋日正式公布副總裁蔡耀君（YK）做到年底就退休，絲絲識咗佢好多年，唔知係咪退休有期，佢表現得分外輕鬆，話退休後冇計劃要做「顧問」或者去私人公司，最想做嘅除咗係抽多啲時間陪老婆，仲想重拾自己嘅興趣，就係進修歷史。
當年海託事件最難忘
七二年加入政府，七四年加入銀行業監理處（現在的金管局），做咗足足35年銀行監管，YK好坦白咁同絲絲分享：「壓力好大，依家就好似冇咗彈力嘅橡筋，要充吓電。」YK最想係花多啲時間陪老婆，佢笑稱過去35年連屋企塊地都冇拖過，最近個菲傭走咗，屋企大把家務等住佢做。
要睇實香港金融體系，辛苦程度可想而知，YK有時做到三更半夜仲要自己煮嘢食，所以佢最拿手嘅係煎蛋同埋煮公仔麵。
講到YK最深刻嘅事，並唔係處理雷曼迷債風波，而係八五年去海外信託銀行做現場檢查，呢間係第一間亦係唯一一間，透過現場檢查而發現有大問題嘅銀行，好彩後來由政府接管咗，否則當時屬本港第三大嘅銀行要「爆煲」，後果可能仲嚴重過雷曼事件。
受三個男人啟蒙最深
喺呢幾十年嚟，YK話受到三個男人嘅啟蒙最深，包括係金管局總裁任志剛嘅高瞻遠矚、前副總裁簡達恒嘅身教言教，同埋未來總裁陳德霖嘅能幹本事。
「有人辭官歸故里，有人漏夜趕科場」。助理總裁阮國恒會喺明年一月一日正式接替YK個位，絲絲同任志剛一樣，祝YK退休後生活愉快。
余絲韻