本文重點
呢個咪係「傻癡癡」入面嘅「黎天王」？仲有巨星學友同成龍喺隔離添。今次絲絲收到嘅私相簿人物，係疑似「黎天王」嘅金利豐證券研究部董事黃德几（Dickie），原來佢喺加拿大讀書時兼職做電台DJ，所以有好多機會訪問大人物。
曾被人搵過做明星
中學時嘅Dickie好貪玩，曾因打架被記缺點，「中四嗰年，叫齊一大班朋友到蘭桂坊一家Disco『開P』，純粹係健康派對，唔係Rave Party，場內冇人食煙，飲嘅只係可樂、橙汁。」Dickie當時成個小明星咁款，應有好多女仔埋身啦。
原來Dickie係唱歌能手，大學時曾參加全球華人新秀歌唱比賽獲得首5名，佢跳舞亦有一手，最鍾意跳Hip hop，扮「草蜢」、「哥哥」，跳米高積遜嘅「Moon walk」，舞步亦似模似樣。唱得又跳得，畢業後曾經有經理人搵過佢當明星，但佢話自己讀經濟系出身，而且受爸爸影響，有興趣喺證券行發展。
Dickie話呢行嘅發展空間大，依家目標都係做好呢份工。佢間公司今年包辦好多配股活動，睇嚟佢嗰份Bonus收入理應唔錯，足夠老婆本有餘。原來Dickie會喺今年十一月結婚，今次揀咗喺迪士尼擺酒，睇吓佢哋啲相，真係甜到入心。
余絲韻