本文重點
中遠老友話，中遠集團揸弗人魏家福嘅博士學位原來係修讀危機管理，加上佢以前做過好多年船長，危機意識好強，佢成日話「贏」字上面係「亡」，所以你想贏嘅話，一定要先諗到敗亡嘅各種可能性，咁先可以知己知彼，百戰百勝。
去年全球金融危機爆發初期，好多人搵魏總幫手做擔保買船，佢全部拒絕晒，事關佢話危機剛啱開始，一出事銀行就會大增貸款利息，咁不如等吓先，等到啲企業開始放棄造船，佢哋先出手買平貨。
鼓勵員工試新嘢
咁有危機意識，咁魏總會唔會過於保守呢？老友話魏總個辦公室掛咗幅漫畫家華君武作品，係一個有鬚嘅ＢＢ畫像，側邊題字寫住「永不走路，永不摔跤，永處襁褓」，所以魏總都好鼓勵員工要謹慎咁試吓新嘢。
佢仲話，喺大陸想做一個成功嘅企業家一定要努力成為「五家」先，包括政治家、思想家、藝術家同實幹家，事關要先明白國家嘅發展方針同政策，又要識得馬克思主義哲學，鑽研領導藝術，再要學識國際通行嘅方式去同外界交往，而且學識嘅嘢又要即刻去做先得喎。
余絲韻