佢話人與人之間嘅了解和溝通好緊要，做調解員就係為咗做好呢樣嘢。佢嘅心得係最緊要中立，不可偏袒一方，不可隨便發表意見，即係話要客觀咁點出雙方嘅實際情況，了解各自嘅立場及問題，然後幫助當事人進行和解。

做調解員唔係判對錯

佢話調解員同法官唔同，唔係去判斷邊個啱邊個錯，係要扮演溝通嘅橋樑，喺和諧冷靜嘅氣氛下達致和解。佢仲話只要肯了解，願意溝通，人與人之間嘅紛爭自然會少啲，每個人喺生活中都可成為調解員。

鄭家成早前親自出馬，支持「光彩明天行動」兼慷慨捐助廣東懷集縣嘅孤兒後，佢喺集團嘅自家刊物《新語》中接受專訪時，亦提點大家做善事，唔好只係為咗表達自己，而應該要當作係幫助無助者嘅責任。

講到尾，鄭家成無非都係想話畀大家知，所有孤兒、失學小孩、病弱老人甚至係受困嘅動物等，都係畀客觀大環境影響嘅無助者，最需要嘅係幫佢哋改變客觀大環境，唔好一味獻上「飯來張口」式捐助，相反應該教佢哋種米嘅根本方法，咁樣佢哋至可以得到真正嘅光明同治療。

余絲韻