大市日升日跌，真係玩死唔少人，經過幾日來盛傳內地收緊銀根消息後，大市縱使有反彈，但已經無晒早前嘅熾熱氣氛。後市唔明朗，一眾鑊鏟友均離場觀望，無人買亦無人賣，靜到不得了，雖個別股仔仍有炒作，但始終帶唔起市場氣氛，睇怕大市都要繼續悶吓，再等新水降臨。
今年金蝶國際（00268）動作多多，上半年六個月內已完成了三單收購合併去壯大業務。經過多年努力，集團已經發展成一家多元化軟件企業。不過，近期股價突然由高位急插，慘被掟番落1.33元，跌穿埋六月嘅1.37元配股價，似乎跌得過分，昨日率先企回配股價之上，似乎完成咗震倉。金蝶本身基本因素絕對唔差，跌至現價有一定值博率，隨時可借業績炒番上1.67元，止蝕設1.28元。
古晨