北大人再派定心丸

巨無霸大笨象（00005）跟祖國移動（00941）分別升2.8%及1.4%，後者更一度重越90元。周小川大派定心丸，指「動態微調」唔係新招，反映北大人無意圖關水喉，紅色錢莊回復生氣，當中以中行（03988）升3.4%表現最佳。超人旗艦（00001）業績不僅未有退步，反勝預期，股價升2%，報收97.9元。和黃（00013）一味靠賣維持盈利，錄得純利57.6億元，雖然按年倒退33%，但成績表唔使見紅，支持股價午後一度升3.7%至59元，散場報收58.15元，升2.2%。

昨日派成績表的恒鼎（01393），早段因被「大魔頭」MSCI祖國指數招攬為成員，股價曾升近4%，但成績差強人意，中期純利大跌78%，又唔派息，股價掉頭向下，下半場跌勢加劇，低見7.86元，倒跌6.8%，報收7.97元，跌5.57%。其他MSCI指數新貴隨魚缸上升，包括吉利汽車（00175）、方興地產（00817）、合生創展（00754）及福山能源（00639）全線上升。

數呢期最巴閉大隻佬，非騰訊（00700）莫屬，昨日再創122.7元歷史新高，報收118元，再升4.3%。或者對看官嚟講騰訊係高不可攀，業務同樣有涉及祖國網絡遊戲的金山軟件（03888），昨日同樣創9.08元新高，報收8.94元，升8.3%，破頂後料升勢持續，目標先睇12元。祖國第二季網遊市場估值69億元，按年增約36%，按季增12%。雖然金山軟件唔係行業內最大規模的企業，但其雄厚研發實力是賣點，有較強勁的競爭力。集團的應用軟件部分，佔集團約三分之一的營業額，其主打當然是網上遊戲。

網遊存在龐大需求

目前祖國的網民已超過3.3億，對網遊需求只會有增無減。金山遊戲中，以「劍俠」系列及「封神榜」最為人熟悉，其主打遊戲「劍俠情緣Ⅲ」將於數月內正式推出市場。估計可以大幅提升集團每月每人付款金額（ARPU）至每個月42元人仔或以上。

另外，祖國3G網絡啟動後，利用手機上網的網民已達到1.55億，佔網民總數的46%，較去年底增32%，可見增長甚速。金山亦兼營移動電話遊戲及休閒遊戲服務，可以話食正3G手機遊戲呢個浪。

古勝