本文重點
樓價愈升愈勁，令唔少準買家擔心低於100萬元嘅細價盤會絕迹，祥益地產總裁汪敦敬（圖中）同Vincent講，為解除市場疑慮，公司昨起推介屯門區100萬元以下嘅200個二手盤，當中67個屬私樓，其餘係居屋，仲會同銀行合作為買家提供九成半按揭，即係揸住5萬元首期就可以上車。
佢仲話，受惠於鐵路效應，近期多咗九龍區買家到屯門買樓，佔總成交比例由25%升到近期嘅40%。
東莞房管局來港交流
西九龍一帶成交大旺，中原為吸納更多買家，旗下中原按揭經紀同永隆銀行合作，為透過該行買入荔枝角美孚新邨及西九龍一帶六大屋苑單位嘅買家，提供特惠按揭計劃，首年利率為P（現為5.25厘）減3.75厘，即實際利率僅1.5厘，其後全期利率為P減3厘，優惠期至十月底。
中港兩地房地產業關係緊密，地產代理人協會主席何潔芝講，尋日接待咗東莞房產管理局一行約20人，帶佢哋參觀地產代理監管局、職業訓練局同中原集團等，介紹香港地產代理嘅文化，交流兩地法規，務求達到「多交流、多裨益」效果。而剛上任嘅地監局行政總裁余呂杏茜，仲在呢次交流首次露面。
Vincent Lau