上周五港股真係嚇死人，單靠中移（00941）頂唔住個市，加上午後內地股市跌多咗，港股跌勢進一步加劇，恒指更失守10日線，跌523點，報收20375點。詩詩見到午後跌勢咁急，以每股2.46元沽出所有國美（00493），一於清倉離場，睇清楚形勢再作打算。
雖然上周五個市係跌到走晒樣，但仍有個別股份表現出色，好似當日裂口跳升的西王糖業（02088），未有受大市影響，逆市升逾7%，走勢出現突破。
西王糖較早前曾發盈警，奇怪係近日發盈警的公司，股價反而有不俗表現，主要係市場相信最壞時刻已過，目前是低吸好機會。由於玉米價格已逐步回落，相信行業已重踏正軌，加上今年國際糖價已較去年十二月顯著上漲50%，有助提升公司毛利。
此外，公司引入高利潤率的下游產品，把部分結晶葡萄糖的生產量轉型至更具獨特市場價值的新產品，預期今年推出結晶果糖及藥用級葡萄糖，將提升品牌的定價能力。近日有基金收集，其走勢又出現突破，料可挑戰2.4元，跌穿1.7元止蝕。
詩詩