10/08/2009

播放本新聞相關短片
 
股價號碼: 

愈少人唱 升得仲多?

上星期中學會考放榜,藍籌股業績期亦展開,啲成績唔知令你「驚」定「喜」呢?面對呢類環境,我一向都抱住「Prepare for the worst and hope for the best」心態,作最壞打算,抱最大期望。成績係點好多時都心裏有數,因為我相信喺大部分情況下,付出同收穫都係成正比,如同好股都係要靠自己發掘一樣!

研究「寂寂無聞溢價」

早幾個月前兩個來自INSEAD(歐洲工商管理學院)嘅學者Lily Fang及Joel Peress發表咗個研究,睇吓傳媒報道對股票回報嘅影響,結果係冇畀傳媒報道嘅股票,平均年回報比有報道嘅高出8%至12%。兩位學者叫呢個回報做「No-media premium」,我譯做「寂寂無聞溢價」。

研究係利用九三年至○二年所有紐約交易所上市股份,與納斯達克上市其中500隻股份做基礎,傳媒曝光率就用美國主要報章如《華爾街日報》同《紐約時報》等做參考,個研究已將市值、估值同流通量等因素考慮,盡量減低其他因素影響。佢哋發現特別係細市值、股權集中、少分析員跟進同埋高波幅嘅股票,有較高「寂寂無聞溢價」。

兩位學者認為出現「寂寂無聞溢價」有兩個原因,一來呢類股份流通性低,出現套戥機會;二來就因為呢類股份少分析員跟進,少人報道,變成唔易取得資訊,所以要靠高回報吸引投資者買入。

高回報靠自己發掘

咁樣講即係要搵好股惟有加多幾分努力,因為人人都輕易得到嘅資訊,無論好嘅壞嘅都好容易反映喺股價上面,呢個就係金融學講嘅「有效市場假設」(Efficiency Market Hypothesis)。總之靠人人都知嘅好消息炒股,回報未必夠自己努力鑽研發掘嘅滄海遺珠咁好。講真,呢個道理你唔知咩,只係人好多時敵唔過惰性啫!

(大健)