黃金比率支持位18900

全球政府製造大量泡沫，但得閒就拋個退市、加息出嚟，企圖篤爆啲泡沫。內地有句話叫「戴花要戴大紅花，炒股要聽黨的話」，《人民日報》海外版引述專家話，股市存在價格泡沫累積風險，跟住人行話其實天天都動態微調，加埋財政部和發改委出嚟派定心丸，真係頭都暈。

Baby個妹就嚟18歲，佢嘅人生目標係盡早去新西蘭退休，佢上個禮拜終於同媽咪夾份買咗人生第一隻股票，就係中移（00941）。Baby相信連阿妹都入市，牛市已經到咗中段，股市短線有調整，佢再有乜嘢行動，我再同大家報告。

中移、滙控（00005）、中海油（00883）等「回A」，但撐唔起上周五嘅港股，恒指全周跌1%。用黃金比率嚟量度恒指，以○七年高位及去年低位計，從低位反彈50%，阻力位係21,300點，支持位係18,900點（低位反彈38.2%計）。

49%股友想追買滙控

「大笨象」會跳舞，滙控股價上周升8%。據《東方產經》網上民調截至上周末下午6時嘅數據顯示，49%網民話有意買入滙控，51%話無興趣。

散戶妹姐認為牛市已經重臨，依家睇住個勢買賣，主力短炒落後股和復甦概念股，佢認為恒指年尾唔難升到26,000點，揚言等30,000點先沽貨。羅太就話，恒指短期喺19,000至23,000點間上落，唔會大跌，亦唔會大升，呢排會「減磅」先，但佢認同牛市已回歸，嚟緊「有排牛」。

大福證券紅磡分行經理Kevin表示，港股長升未必健康，如果大市調整，恒指可能會回落至18,000至19,000點水平，然後再試高位。佢話散戶已喺高位沽貨獲利，然後再喺上落區間買貨。

去銀行買嘢要有耐性

Baby上個禮拜去中銀做外幣掛鈎存款，由於係結構性產品，預咗要做銷售錄音，結果喺1小時25分鐘之後，都只係做咗兩個錄音，包括個人投資風險評估和開期權戶口，如果真係做掛鈎存款，要再做多一個錄音，既然已經開咗戶口，可以網上自己做，就梗係即「撇」啦！喺錄音過程中，銀行職員同Baby都戰戰兢兢，驚講漏嘢，因為Baby第一個錄音唔記得講自己資產有幾多，結果要錄多一次！

有錢真係唔係大晒，依家去銀行買嘢，時間同耐性先係最重要！睇番恒生（00011）份中期業績，喺理財業務收入中，投資收入較去年底升6%，其中證券經紀、孖展相關收入分別升25%及13%，結構性投資產品銷售微升6%，零售投資基金、私人銀行業務就跌27%及5%。

（Baby）

若然有料想報畀Baby或有嘢問，可電郵money.biz@opg.com.hk