大市回吐壓力愈來愈大，上周五市場傳出內地有人因挪用資金炒股而被捕，引發大股細股齊齊屠殺，一線至四線股份都殺個不停，殺到鑊鏟友個個雞飛狗走。股市連升四個多月後，累計升幅又唔細，自然多人止賺，短期回調自然在所難免，各位入市亦應小心為上。
內地零售股一直是市場較看好的一個板塊，新宇亨得利（03389）本身擁有內地名錶銷售網絡，今年六月曾配股集資6.2億元，其後股價出現小圓底收集，走勢相當靚，上周五啲股仔遭狂殺，惟新宇亨得利依然硬朗，可見有幾硬淨。
古晨最鍾意係新宇無點大炒過，仍有足夠新鮮感，班基金大戶埋晒位，在追落後下，要炒上4元絕對唔難，而止蝕位不妨放於2.6元。
古晨