古勝之前講過，預期本地魚缸在八月份或會調整，但調整深度有限，皆因市場仍然水浸。不過，上周祖國魚缸明顯腳軟，加上憂慮北大人隨時關水喉，A股已連跌四個交易日，上周五更拖累本地魚缸失守10日線。恒指上周五急挫523點，收報20,375點；國企指數更跌440點，收報11,612點。上周五整日跌勢持續，加上成交額高達936億元，沽壓增加，似乎真係有缸邊友先離場觀望。

孖屐憂慮紅色錢莊貸款急降，加上有缸湖傳聞指深滬兩魚缸，最近兩日錄得高達174億元人仔的資金流出，祖國魚缸上周表現疲弱。本地魚缸則單靠個別大隻佬死撐，唔少紅色重磅股跌到一仆一碌，尤其紅色錢莊及地主係重災區。祖國移動（00941）逆市而行，盤中高見90.85元，散場維持1.6%升幅，報收88.5元，多得佢撐住，否則恒指跌幅或逾3%。

雖然祖國跟本地魚缸上周腳軟，但在下認為大市調整屬正常，只要唔係大屠殺，仍可以炒股唔炒市，個別股份仍有得諗。古勝今日心水係以供應石油化工及鐵路行業的緊急及安全控制系統，並提供相關工程及維修保養服務的中國自動化（00569）。

預留現金拓展業務

中自化日前宣布，截至五月年內新增定單金額已逾5億元（人仔‧下同），今年新增定單情況符合年初規劃，料全年新增定單金額可達12億元目標。中自化明年擬進軍市場規模逾40億元的城市軌道監控系統業務。中自化今年新增定單仍以石化業務為主，但鐵路業務定單比例已增至45%，集團希望鐵路及石化業務收入保持約40%及30%平穩增長。

中自化手持茄薯近6億元，主要用作購併監控系統供應商、擴大集團鐵路監控系統業務，集團希望收購目標的作價市盈率不高於8倍。祖國鐵路部已表示在未來3年內，每年投放1,000億元改善內地鐵路措施，預期中自化的整體業績會受到兩個主營業務所帶動，值得中線吸納。

古勝