05/08/2009

播放本新聞相關短片
 
股價號碼: 

絲絲講場:經紀協會改名擴範疇

證券經紀業協會成立已經三十年,個會嘅名字亦沿用咗卅載,不過呢個名將會成為歷史,因為該會已經決定改名,刪除「經紀」呢兩個字,新名稱係證券業協會。

反映非局限代表經紀

該會嘅主席李耀新解釋,雖然大家都好唔捨得個舊名,但因為要配合時代嘅發展,唔只局限於經紀,而係要擴大會員嘅基礎,好似接納其他範疇如資產管理、企業財務等嘅專才,所以委員會最終決定要改名。

該會有啲委員就話,近年佢哋四出到海外推介本地證券市場時,發現唔少地方嘅證券組織以為證券經紀業協會只係代表經紀,一來範圍太過狹窄,二來亦好似唔夠檔次,所以就有呢個改名行動。

本月該會將選出新主席,估計係兩名現任副主席即大福證券集團(00665)執行董事李耀榮同嘉信控股董事及總經理馮煒能之爭。喺尋日嘅飯局上,筵開兩圍,李耀新同李耀榮分別以主人家身份各坐一圍,呢個坐法唔知有冇玄機,代表李耀榮獲睇高一線呢?

唔講唔知,近年該會贊助出版咗幾本書,其中一本係唐詩宋詞英文譯本,李耀新笑稱,唔好以為經紀淨係識講錢!

余絲韻