上個星期，中港兩地股市一度出現深度調整，令人擔心是次升浪是否經已正式結束。但及後人行宣布寬鬆政策不變，中港兩地股市再度發力向上。上周五上證指數重上3,400點樓上，而恒指亦成功收復20,500點水平。
上周市場大炒回歸概念，上周五一眾落後紅籌都見炒上，愈落後升勢就愈急，好似粵海制革（01058）就全日升逾14%，成為當日紅籌升幅之冠。由於現時市場正瀰漫着一股紅籌熱，大家不妨從中尋寶。
內地股市氣氛暢旺，樓市亦唔輸蝕。不過，根據深圳國土房產局的數據顯示，其實深圳新房成交量已連續三個星期下降，且出現加速下滑趨勢。近日有中房協官員直言話要阻止房價漲勢蔓延，故不排除及後真的會有抑制房價政策出台，要留意內房股走勢。
（小尾）