銀紙貶值被迫投資

先搞清楚，依家想講「名義利率」會唔會負數，唔係成日聽到嗰個扣除通脹後嘅實質利率。負利率過去有發生過，如上月初瑞典將存款利率下調到負0.25厘，但負借貸利率好似係史上未見。著名經濟學教授Greg Mankiw早幾個月時建議聯邦基金目標利率減到負數刺激經濟，引起好多討論。

理論上HIBOR可以係負數，假設負2厘，即係銀行借100元出去無息收之餘，仲要送多兩蚊畀借貸人。實際上，借錢唔使畀息仲有現金回贈，邊個肯借錢畀你呢？同時當HIBOR係負數時，存款利率都會變成負數，存錢入銀行反而要畀息，無人存錢，銀行亦無錢可以借出街。

咁樣你會發現有錢都係自己使咗佢好過。關於通脹，有句名言係「Too much money chasing too few goods」（太多錢追逐太少貨品），大家不斷消費同投資會造成通脹，包括資產價格大升。係咪有錢就會投資？當你發現手上現金一日比一日唔值錢，而樓價每日創新高，我諗你自然明白。

長遠嚟講，負利率慢慢會消失。當出現資產泡沫，投資氣氛熾熱，就算手頭無錢都會想借錢投資。你見投資回報勁，自然唔怕畀息，借貸利率漸漸會去番正數，資產泡沫亦存在爆破危險。

資產泡沫愈谷愈大

喺自由市場機制下，負利率應該唔會出現，但Impossible is nothing（凡事皆可能），如果政府強行將借貸利率定為負數，資產泡沫會愈谷愈大，但同樣會出現Hyper-inflation（惡性通脹），當本地貨幣大幅貶值，你手頭嘅資產相對外幣根本唔值錢，所以話政府泵水救市都要適可而止㗎。

希望有專家睇完呢篇文後花少少時間指點吓、討論吓。

（大健）