Baby怕熱氣，但都鍾意喺街邊篤魚蛋食。原來華富嘉洛證券都有「煎釀三寶」，唔係講笑，佢哋係羅慧妍（Betty）、陳倩姮（Sinnie）及甄靜敏（Doris），3位都係投資策略師，股票、期貨、外幣市場都要兼顧，間中要上內地嘅電視台接受訪問。「煎釀三寶」呢個稱號係佢哋自己改嘅，諗過叫S.H.E.（台灣女子樂隊），但因為3個人嘅嗜好都係食嘢、行街，而且都好鍾意食煎釀三寶，故因此得名，佢哋喺網上仲有信箱、手記同分享模擬投資組合（主要為期貨）添！

大戶借滙控舞高弄低

咁「煎釀三寶」點睇呢個市呢？Sinnie認為喺牛市嚟講，恒指現水平已經略高，但仍可上望23,000點，19,000點有支持，大戶緊盯滙控（00005）今日公布嘅業績，用「大笨象」嚟舞高弄低個市。「煎釀三寶」認為70蚊樓下可吸納，目標價80蚊。翻睇佢哋喺三月所寫嘅手記，當時並唔睇好滙控，Betty直至今日都認為滙控呢個「老公」可以唔要，3位女生都揀內銀股做「長期飯票」。「我鍾意建行（00939）同招行（03968），尤其係前者有爆炸力，工行（01398）同中行（03988）就郁得比較慢。」Doris話。

散戶估計炒到九月中

Baby上周三落咗致富證券觀塘分行，散戶黃小姐話，好多貨喺17,000點水平沽晒，現時個市升得又多又快，都唔敢買貨，眼白白睇住個市升囉，佢相信21,000點係一個大阻力位。張太就表示，市場有太多熱錢，股市好難再向下落，現時好多散戶爭住出貨，佢估計股市回落少少之後就會回升，個市應該可以玩到九月中旬。

分行經理Edmond就話有少少○七年大牛市時嘅感覺，港股持續做好加上之前金隅（02009）招股，多咗唔少散戶開戶口，佢仲話之前唔少客買「熊仔」（熊證），依家就少咗嘞，但仍無乜人買「牛仔」（牛證），可能因為正股已經好好炒。

內地股民未摷籠底錢

滬綜指上周全周微跌23點，鬼咩，上周三A股曾經大插近8%，好彩阿爺（人行）漏夜澄清適度寬鬆貨幣政策不變，收市先跌少啲。Baby最近問大陸廠佬P佢哋班工人有無炒股，佢話無，因為由六千幾點撻落嚟時輸晒咁滯。好彩內地人「窮慣」，所以之前大冧市無造成社會動盪，估計散戶今輪升浪仲未大舉入市，主要係大戶炒啫。如果內地基層散戶仲未將籠底嘅錢摷出嚟炒股，未算係全民皆股，泡沫應該只係初現。

後日會考放榜，同學們加油！

「煎釀三寶」簡歷

甄靜敏（Doris）

年齡：23歲

學歷：理大專業中英語文學士

陳倩姮（Sinnie）

年齡：24歲

學歷：浸大地理系學士

羅慧妍（Betty）

年齡：26歲

學歷：在英國完成工商管理學士、市務管理碩士

註：3人全為證監會持牌人（證券及期貨合約交易）

（Baby）

若然有料想報畀Baby或有嘢問，可電郵money.biz@opg.com.hk