本文重點
絲絲前排去雲南旅行，仲去埋村落感受當地風土人情，咁啱就畀絲絲發現，有個廁所門口寫住香港恒生銀行同埋香港長春社兩個名，究竟係咩廁所咁巴閉？原來係可以提供再造能源嘅沼氣廁所。
大家應該記得絲絲提過，恒生（00011）喺雲南贊助興建沼氣廁所，話咁快300個廁所已經完工，令1,200個村民受惠。其實計埋上一年嘅計劃，恒生一共喺雲南省贊助興建咗500個沼氣廁所，超過2,200名村民受惠。
提供免費再造能源
今次呢300個沼氣廁所，可以令當地每年減少砍伐750噸柴，即係大約180英畝樹林，每年減少3,750噸二氧化碳排放。
透過沼氣廁所，人同豬嘅糞便都可排放到地下沼氣池，釋放出嚟嘅沼氣經適當導引，就會成為免費而且供應穩定嘅能源，用嚟煮食同照明都得。咁就可以慳番班農民砍柴嘅時間同精力，而且沼肥又可成為天然肥料替代化肥。所以話，呢啲廁所真係「一個也不能少」！
余絲韻