本文重點
股市火熱，恒指直撲二萬點，加上新股孖展熱爆，上市後又表現不俗，唔少企業都紛紛重啟上市籌備計劃。年前曾經講過話會研究上市，兼且一向噱頭多多嘅耀才證券，其總經理陳啟峰亦話趁住近期市旺，會重新啟動上市計劃。
佢話上個月已經同幾家投資銀行接觸過，希望今年內搵到一家合適嘅保薦人，盡快搞上市，由於籌備起碼需時半年，佢估計明年至可以上到市。
估後市大漲小回
今次佢哋算係重提上市，陳啟峰承認今年年頭時市況咁差，當間間企業都講緊裁員減薪時，佢哋亦停咗上市嘅研究。不過，佢認為依家個市已穩定番，並且相信最差嘅時期已經過去，後市最多只會因應外圍借勢調整吓，屬大漲小回格局，支持位喺萬八點，所以對後市好有信心。
股市重現升勢，證券行就即時動作多多，既有重提上市，又有積極招聘人手，所以話，香港人轉數幾時都咁快！
余絲韻