美聯深圳連開6分行

Vincent又八到，唔少樓花新盤都賣得幾好價，忠誠鄭世傑話，上水御景峰中層J室喺拍賣會賣咗370萬元，高開價8.8%，原業主持貨兩個月帳面賺咗11.3萬元，同場沙田壹號雲頂2座中層B室就賣咗1,128萬元，高開價7.6%，單位七個月升值64萬元。至於將軍澳居屋煜明苑A座中層13室銀主盤，就以178萬元成交，亦高開價12.7%。

中國經濟增長迅速，「保八」在望，美聯中國亦睇好內地樓市，昨日就一口氣喺深圳開設六間分行。美聯集團顧問張錦成仲同Vincent講，為獎勵內地一眾後勤同事嘅努力，考慮向他們派發第二度花紅，聽講部分同事最高可獲相等於一個月薪金嘅花紅，真係令香港好多打工仔羨慕。

美聯中國行政總裁郭應龍話，上半年深圳好多一手新盤銷情理想，個別更已達全年目標銷售量的八成，至於二手市場亦見價量齊升，所以下半年將進一步招聘人手及增設分行，並會喺北京及上海等地增加分行。

香港專業地產顧問商會會長汪敦敬透露，屬下5至6名會員將於下月一至五日，不約而同開設分行，涉及約10間地舖，明日會公布詳情。

（Vincent Lau）