港股連續第五個交易日上揚，恒指尋日朝一開市就經已輕輕鬆鬆升穿19,000點，及後升幅不斷擴大。除藍籌外，各類型股份都齊齊做好。其實大市走勢咁好，投資者真係不宜逆市做淡，以尋日為例，一班熊仔熊女又再度當殃，全日就共有110隻熊證被強制收回。看來大戶挾淡倉之勢仍未改變，做熊仔都係忍一忍先為上。
另外，近日「力拓」一事，亦令市場焦點再度放在鋼鐵股身上。不過鋼鐵股做好，似乎同力拓無乜關係，反而係因為市場有傳一年一度的鐵礦石談判，有機會由年度化改至季度化。如果消息屬實，此舉不但可為澳洲及中國就今次鐵礦石談判提供一個較折衷方法，令談判可獲順利通過，而且由於談判將每季作出調整，亦有利鋼鐵廠日後的營運呢！
（小尾）