馬蔚華最新發表咗篇文章，就係用出海游水嚟比喻內地銀行國際化嘅過程，佢話內銀事實上仲未出海游水，所以就算金融海嘯捲到嚟，佢哋都講唔上話會淹死遇溺。

不過佢出海嘅心意係好堅決，話內銀遲早都要下海，遲早都係要國際化，所以依家就一定要學好游水，好等下一次再有洪水突襲時，內銀都可以化險為夷。

招行英設代表處「試水」

哈！其實招行早幾日就已經處女下海，喺英國倫敦開咗第一間代表處，先浸個鹹水先！馬蔚華話，如果死守國內，根本就學唔識游水，今次係要出去了解國外嘅遊戲規則，知道風險係乜嘢一回事，又要睇吓乜嘢類型嘅業務先搵到錢，練番一招半式先。

招行能唔能夠成為泳壇健將、馬蔚華又可唔可以成為內銀「飛魚王子」，我哋就一於拭目以待！

余絲韻