雷曼講到明雖然家陣破咗產，兼被巴克萊分咗北美證券、不動產業務，但凡係印有雷曼「嘜頭」嘅商品，都唔屬於以上交易範圍之內，所以一個屈尾十又可以無本生利賺多筆，搞呢個清倉大拍賣。

不過絲絲就唔多明白，人哋米高積遜就話天皇巨星，有成千上萬嘅歌迷爭住要買佢啲遺物紀念吓啫，雷曼兄弟留畀大家嘅印象，真係只有「累埋兄弟」，無理由拎啲客戶和員工贈品出嚟賣，又話可以發財喎！

痛苦回憶值得紀念？

唔好以為絲絲同大家講笑，連雷曼自己都話呢啲商品真係有市場需求。一把低成本雨傘只要印咗雷曼個嘜頭，竟然可以賣成20美元，雷曼就話呢把紀念傘可以抵擋時速80公里強風；另外一款熱賣嘅帆布袋仲標價35美元。最令人咬牙切齒嘅係，雷曼今勻仲要威到下周喺曼哈頓個辦公室，設門市出售類似嘅紀念品，唔通愈痛苦嘅集體回憶，真係愈有紀念價值？

余絲韻