本文重點
合景泰富（01813）前年同富力地產（02007）一齊投得廣州珠江新城獵德綜合商業發展項目，後來仲引入埋新地（00016），希望集3間公司所長搞好個項目。絲絲尋日就喺合景執行董事兼首席財務官徐錦添嗰度八到，原來當日呢個投資額過百億項目嘅簽約地點，並唔係律師樓又或者辦公室，而係新地副主席兼董事總經理郭炳江嘅屋企！
點解會咁特別喺郭生屋企簽約呢？荷夫曼（徐之洋名）冇特別解釋，可能係郭生平易近人，鍾意招呼生意夥伴去佢府上坐吓。荷夫曼又話，當日簽完約之後喺郭生屋企食埋飯，仲大讚郭生屋企個廚師好掂添！
講番合景，佢哋喺廣州珠江新城嘅國際金融廣場（IFP）出租率相當唔錯，內地四大銀行以至唔少跨國企業都係租戶。
穗IFP似鬚刨啱銀行租
荷夫曼爆料話有風水師睇過IFP，指呢幢大廈外形似鬚刨最啱銀行租用，因為可以「刨」多啲錢返嚟咁話！絲絲查過，原來IFP同香港IFC二期出自同一位名師手筆，唔怪得進駐香港IFC啲大銀行「刨」到咁多錢啦！
余絲韻