昨日恒指直闖19,500點，創今年新高，不過啲股仔表現只係一般，高開後已見乏力，就連下午大市再上高位，好多股仔不進反退，成個氣氛轉晒，相信同隻中國公共採購（01094）急插咗兩成有關。中國採購近期都係熱炒之物，昨日急挫到好似被人斬倉咁，的確嚇親唔少鑊鏟友。古晨覺得啲股仔又再風高浪急，應該又係提高警覺嘅時候。
恒指直撲兩萬點，基金炒完股仔又轉炒番正路股，近期汽車股可以講係消息多籮籮，先有六月份汽車銷售創下高位，再有舊車換新車嘅優惠補貼，令一眾汽車股成為基金追貨目標，華晨汽車（01114）連升幾日後，見成交減少，但股價卻未見壓力，昨日買盤不絕，強勢再現，破位在即睇1.4元，跌穿1元止蝕。
古晨