本文重點
上周六颱風蘇迪羅襲港，絲絲見到天文台話咁快就掛咗風球，約咗朋友嘅活動都取消晒，好友仲忠告絲絲無乜事都唔好出街。不過絲絲一於少理，照出中環兜番轉，竟然見到滙豐亞太區主席鄭海泉風雨不改咁出現喺總行，心諗鄭大班唔通周末都晨早返公司開會？
賣旗日為義工打氣
絲絲睇真啲，鄭海泉身邊仲有佢夫人鄭曹志安、滙豐亞太區可持續發展總監區佩兒以及代表滙豐義工嘅「大蜜蜂」，先至記得嗰日係「711全港賣旗日」，鄭大班係冒住風雨落區為一班賣旗同事打氣！滙豐義工由中環賣旗賣到落灣仔，鄭海泉亦馬不停蹄兩頭走去探訪同事，佢哋見到上級親自落區都士氣大振，落力到連鄭海泉都唔放過，佢當然為善最樂，絲絲估佢都會捐得特別開心。
上周末天氣唔好，風勢又大，不過區佩兒話滙豐仍有超過280個員工同家屬一齊賣旗，總共投入1,700個小時，聽講有啲員工仲帶埋仔女一齊參與賣旗。
余絲韻