過去兩日，股仔已見有異動，昨日下午大市掉頭回升，唔少股仔升勢更為凌厲，計落股仔休息回氣都有兩三個禮拜，調整足夠掉頭炒上亦係合情合理。
古晨留意到隻中科環保（00351）走勢相當唔錯，近日大市雖然跌得幾急，不過中科環保沽壓唔大。集團自易手後，擬收購環渤海地區的遵小鐵路，而且更放晒風話以後會有更多鐵路注入，未來將朝物流概念進發。
中央將積極發展環渤海地區，未來物流業一定相當興旺，中科環保今次應該係執到寶，難怪近期0.14元見排晒隊收貨，六月初集團曾於0.122元配股集資，只要股價穩守配股價，不愁無炒上機會，趁現在收集完剛起步，不妨小注跟進，向上睇0.2元，止蝕就定0.122元。
古晨