本文重點
內地銀行業今年大開水喉，之不過洶湧錢潮除了流向政府主導的大型投資項目外，得益最多的可能要數股市同樓市，反而最等錢使的中小企及鄉鎮企業，仍然要為借不到錢而頭痕。千萬不要以為農村貸款一定係無利可圖的豬頭骨，其實農村貸款不但風險細，回報率亦比一般企業貸款高出好多。
農民少有走佬事件
金占士聽銀行老友講，在內地投資的村鎮銀行，每單貸款額雖然不大，有時甚至只係借幾千元畀農民買隻牛、買個泥耙之類的生財工具，不過無抵押貸款的利息可以高達十幾厘，而最重要一點是農民多數都好淳樸，很少出現走佬事件，所以村鎮銀行的不良貸款率近乎零，淨係呢樣已經跑贏一般商業銀行成條街。
講起村鎮銀行，金占士第一個想起的是，幾年前獲諾貝爾和平獎的孟加拉格拉明鄉村銀行創辦人穆罕默德‧尤努斯。佢可以話係推動無抵押小額農村貸款的先驅人物，現時有成二十幾個發展中國家，都係倣效格拉明鄉村銀行模式建立自己的農村信貸體系。
當然在商言商，普通村鎮銀行無辦法做到好似呢位諾貝爾和平獎得主咁，成日都免息將錢借畀窮人，不過農村貸款仍幫咗唔少有需要的人，而對銀行來講，亦真係一門風險細、回報高的生意，難怪本港幾間銀行都爭住返內地支持農村金融業發展啦！
金占士