本文重點
國美電器（00493）尋日出通告，話一家持有國美8.89億股（相當於6.97%）嘅公司Retail Management決定要重組，將股份發還番畀持股人。Retail Management由國美總裁兼主席陳曉控制，陳曉持有嘅股份約佔3億股，佢趁呢次機會將7,000萬股畀咗佢囡囡當做禮物，以尋日收市價計，呢批股份值過億元；其餘仲有5.76億股同埋765萬股就分別畀番永樂員工同一位受益人，目的係希望持股人可以直接持股同埋自己決定係咪供股喎。
呢排身兼兩職嘅陳曉真係新聞多多，尋日有內地傳媒話佢想將個總裁位讓畀新一代接班人，不過報道一出都即刻畀公司否認，國美老友話番畀絲絲聽，事件嘅起因係由內地傳媒一餐飯局引起。
傳媒吹風吹歪咗
呢排國美引入貝恩投資事件明朗化，亦擺脫咗黃光裕被扣查事件後造成嘅財務困局，陳曉都覺得係時候出嚟同傳媒傾吓公司今後嘅發展大計，所以近排同時喺中港兩地約晒啲主流傳媒食吓飯，睇吓傳媒有乜嘢問題想知得多啲，希望可釋除佢哋同投資者嘅疑慮。點不知咁就出事嘞，有家內地報紙問佢會喺國美做幾耐，陳曉就話無人可保證做一世，亦都無人知，講吓講吓就變咗陳曉想讓埋個總裁位出嚟。
余絲韻