表現良好提早放監

呢個消息尋日喺市場傳出嚟，創維都要專登出通告，證實咗黃宏生喺本月四日返咗屋企，絲絲尋日打佢手機時，佢電話都有響，聽啲響聲係喺大陸，但響到一半就畀人熄咗。於是絲絲就打畀創維老友了解吓情況，事關個市傳佢係提早保釋出獄嘅，點不知老友話，無錯，黃總係出咗獄，不過係因為表現良好而提早咗放佢，咁究竟黃宏生會有啲乜嘢新部署，又或者會唔會再重返創維呢？

獄中關注創維業務

老友話黃總想低調啲，暫時都無乜嘢打算。話係咁話，絲絲聽講黃總雖然喺「出事」之後辭咗創維主席個位，但佢嘅家族依然係公司大股東，而且就算坐緊監嘅時候，創維都會有專人每隔一段時間向佢報告公司嘅事務，就算佢喺入面，都非常關注業務策略，雖然佢「出冊」後有一段相當日子都唔可以名正言順咁出任或參與公司事務，但坊間估計「彩電大王」唔會咁輕易退下火線。

黃宏生係喺○四年被廉署拘捕，○六年被裁定串謀盜竊及詐騙上市公司資產等罪名，判監6年，扣埋啲假本來應該明年期滿出獄。

余絲韻