本文重點
近幾個月樓市成交暢旺，Vincent見到唔少人都考牌加入物業代理行業，據地產代理監管局最新公布嘅數字，持牌代理人數已經突破二點三萬人，創今年新高，按月增加約二百人，人數返番去舊年底水平，同去年十月嘅歷史高位只係相差二千一百人左右。至於有限公司經營嘅代理行有一千七百四十二間，涉及二千六百二十間分店，兩者分別按月上升百分之二及一點七。
前嶺南地皮擬加高限
另地監局同Vincent講，今年全國房地產經紀人執業資格考試將於十月十七及十八日舉行，有興趣嘅香港持牌物業代理，可通過香港京港學術交流中心報名投考有關執業試，截止報考日期為本月底。
政府為回應社會訴求，近年密密手為準備賣嘅地皮加入發展限制，希望避建屏風樓，Vincent八到，城規會今個星期五將會傾東半山司徒拔道前嶺南學院地皮嘅規劃大綱，據聞，幅地會維持「綜合發展區」嘅土地規劃，由於現有地積比率只有約零點九五倍，即可建樓面僅約十八萬方呎，已經好低，所以唔建議調低。
不過，今次就建議加入高度和非建築地帶限制，以保持地區嘅優美環境；幅地近東山臺，該地帶物業高限由一、二層至十餘層，算係較低矮發展，相信前嶺南學院幅地都會係咁上下。
（Vincent Lau）