本文重點
一場金融海嘯令全世界嘅有錢人身家大縮水,而台灣嘅富豪就有啲唔同,因為有兩岸話題,所以比較起嚟算係跌少咗。旺旺中國老細蔡衍明及康師傅控股董座魏應州仲因為喺內地發展好,身家大幅上升添。
蔡衍明身家逆漲78億
根據《福布斯》最新公布嘅台灣富豪排名,榜首仍然由台灣最大嘅金融控股公司國泰金控董事長蔡宏圖穩坐,不過今年就夾埋細佬一齊以51億美元奪魁;蔡宏圖叔父蔡萬才由於經營富邦金控有道,今年以42億美元躋身第2位。雖然上一代早年分家,但後人不但守住份家產,而且仲愈做愈大添。
計番台灣最有錢嗰40位富豪,過去一年嘅身家由770億美元降至550億美元,唔見咗超過28%。但唔係人人都蝕錢嘅,好似蔡衍明就喺一年內多咗成10億美元(約78億港元)身家,仲排喺富豪榜第3位添;魏應州亦憑康師傅身價上漲,財富多咗5.5億美元。呢兩位都係做食品生意嘅,大家有無得到啟示呢?
余絲韻