本文重點
忠旺（01333）原本係今年上半年全球集資額最高嘅新股，集資額達98.44億元，但因為VisaNet喺上月二十九日即係上半年剛結束前一天，搶閘喺巴西交易所上市，集資額高達43億美元（約335.4億港元），所以喺香港上市嘅忠旺就最終「飲恨」，未能成為上半年嘅全球新股集資王。
港新股佔全球近1/3
雖然忠旺未能為香港爭取成為今年全球新股集資王，但香港喺上半年仍然係全球最活躍嘅新股市場，無論係新股數目定係集資金額，已佔去全球新股市場差不多三分之一，喺現時咁嘅經濟氣候下，都算係好唔錯嘅成績。
計埋今日上市嘅霸王（01338）同中國秦發（00866），香港今年共有20隻新股上市，截至六月底，今年新股集資金額達174.09億元，其中第二季已達158.49億元。加上金融海嘯後首隻H股金隅正進行上市聆訊，如果無問題，就會全速喺本月招股，連埋其他如民生銀行、復星（00656）旗下國藥控股等正籌備上市，睇嚟今年新股都有排熱鬧！
余絲韻