本文重點
地產代理為求把握時間，有時即使深夜亦都會議價，有代理就同Vincent呻，土地註冊處嘅網上查冊服務限時限刻，甚至間唔中會出現故障，因而令買家錯失入市嘅良機。香港地產代理商總會主席李純鶴講，早排就有一個西區物業嘅買家喺落訂買樓之前，因為網上嘅查冊服務突然壞咗而取消咗交易，第二日賣方仲決定封盤，令買家到依家都仍然未搵到心水單位入市。
信置商場「日日無膠袋」
五大地產代理商會表示，要解決這些問題，網上嘅查冊服務就一定要有後備系統，最好仲要有二十四小時服務，佢哋又要求政府要成立中央資料庫，將單位嘅實用面積同入伙紙日期印喺差餉單上面，咁樣可以方便代理之餘，亦可以令到買家更有保障，所以遲啲會將意見書提交畀政府同立法會。
另外，政府即將推出塑膠購物袋環保徵費計劃，信和集團執行董事楊光就話畀Vincent知道，信置（00083）旗下包括奧海城同屯門市廣場等11個商場亦都會喺七月七日起，推出「日日無膠袋」行動，仲會送出超過1,000個環保購物袋畀旗下嘅住宅租戶。
楊光話，商場嘅顧客只要用10蚊就可以買到由本地著名插畫師設計嘅環保購物袋一個，由於今次活動旨在響應環保，投資額並唔係重要嘅考慮因素，收益更加會全數撥捐畀環保團體綠嶺行動。佢又話，集團亦都同多個政府部門合作推出環保學堂，為旗下員工灌輸環保知識。
（Vincent Lau）