港股周二升抵18,883點後動力頓失，就連首日上市的361度（01361），表現唔算特別標青，股價雖曾一度高見4.28元，但及後亦見回落，最終升8.03%，收報3.9元。
不過，尋日香港假期，見摩通報告指，預計年內上證指數可突破3,200點，而且下半年H股依然呈現強勢，因此上證指數尋日終於衝破3,000點關口，以挨近全日高位收市，報3,008點，唔知算唔算係送畀香港人的一份禮物呢。雖然恒指今日到底會否借勢做好，都只係五五波，不過上證表現咁好，對港股下半年首個交易日總算係一個利好支持。
講番市場消息，中央匯金所持有的中國銀行（03988）1,713億股限售股即將解禁，故市場擔心內銀股又會面對沽壓，不過匯金似乎早已預料市場的擔憂，因此經已率先表示「股份解禁不等於減持」，言語間唔單只滲透出無意減持之情，更可謂向好友們大派定心丸呢。
（小尾）