361度近年發展得特別快，唔少人以為佢係一間新公司，但原來公司已有超過20年歷史，一班管理層喺運動用品行業亦有多年經驗，不過公司之前一直都係用「別克」呢個名嚟經營，直到○三年改名361度後，喺大肆宣傳下先至廣為人知，所以先有人誤會佢係間新公司囉。

舊名撞通用汽車品牌

咁點解361度要改名呢？皆因公司舊名同通用汽車旗下一個同樣叫別克（Buick）嘅牌子同名，當時公司創辦人丁建通，即係依家361度總裁丁伍號嘅外父為免惹起官司爭拗，於是決定改名。至於點解叫361度，查實係因為老闆覺得公司前身嘅輝煌業績最叻都只係「一個圓滿的360度」，所以新公司名索性加多一度，即係「多一度投入，多一度付出，多一度激情」，仲有對運動、企業、社會「多一度熱愛」咁解囉。

余絲韻