恒指守住17,600點又有反彈，外資繼續湧入追內銀股，一眾內銀股升唔停。資金轉炒番啲大嘢，股仔又即時腳軟軟，早前勁炒嘅中國風電（00182）走勢認真麻麻，連跌四日後，連0.9元都失守埋。其實上周開始唔少股仔都轉弱，昨日大市反彈弱勢更明顯，股仔本身炒味較濃，升得急時回也急，所以謹記要嚴守止蝕。
內地再放寬外資直接投資房地產，刺激內房股向上，雖然過去幾個月內房股累計升幅好大，不過仍有唔少股份仲係較資產值出現折讓，有一博價值，好似隻合景泰富（01813）就係其中一員。
內地新增貸款於五月份曾經增幅放緩，不過六月又再增加，對內房股亦係另一個刺激，上半年合景銷售額同比增長成五成，現時銷售已達到預期中50億元人民幣的一半，股價出現折讓有一定吸引力，近日剛有好消息配合，估計可炒上6元，而止蝕可放於4.2元。
古晨