本文重點
中大印刷（00055）用6,500萬元向大股東收購藝人管理公司Neway Entertainment單交易，竟然畀非執董歐先生反對，仲引起投資界唔少回響，揸大旗嘅薛嘉麟（Ernie）大感無奈。絲絲尋日同佢傾開，Ernie話事前大家有唔少溝通，呢盤生意雖然起步只有幾年，但前景真係好好，如果唔係，大股東都唔會主動提出畀中大印刷一個認沽權，反映佢哋對呢盤生意真係好有信心。
絲絲好奇，點解唔花少少錢，搵個獨立財務顧問睇單「刁」，小股東咪安心啲囉！Ernie話最清楚業務前景嘅係佢哋，花喺財務顧問嘅幾十萬，係唔易賺嘅錢，真係好精打細算喎！
上市大計伺機啟動
Neway卡拉OK兩年前曾經想獨立上市，但係個市唔多就，於是擱置咗，Ernie話只要PE去到20至25倍，都會再啟動上市計劃。大陸嘅卡拉OK生意固然大有作為，Ernie話香港都唔差，依家去唱K嘅人年紀拉到好闊，由幾個月大（當然係被父母抱住去）到80歲都有，太太團嘅興致更不得了，仔大女大都要搵啲節目自娛。絲絲建議Ernie去領匯個場開檔，原來Ernie都諗到呢條橋，仲話傾過添，不過開卡拉OK要好大樓面，所以一啲都唔易。
另外，佢哋原來同香港管理協會有合作開辦相關課程，同業可以進修攞番張沙紙，佢哋嘅員工更可以申請借調去其他國家學習，邊個話工字無出頭！
余絲韻