本文重點
時間過得真快，唔經唔覺騰訊（00700）今年已經成立咗10年，今日更加係上市五周年嘅大日子，絲絲記得騰訊個「嘜頭」係隻企鵝，當年點解會揀咗企鵝做公司嘅吉祥物？別號「小馬哥」嘅主席馬化騰答話，佢當時乜都有諗過，好似花花、草草甚至牛都諗過，但結果就畀佢遇上咗企鵝，睇嚟小馬哥同企鵝嘅緣分都唔輕。
騰訊嘅大日子，小馬哥招呼一班朋友到佢深圳嘅公司參觀兼傾偈，絲絲例必問吓佢今日會有乜嘢慶祝活動，點知一向低調嘅小馬哥話唔會有咩特別慶祝，笑住話今日可能開吓會慶祝喎，公司亦好似無乜人提起呢件事。
成立十載同事齊心
至於問佢依家嘅心情同10年前有乜唔同，小馬哥諗咗一陣就話，10年前主要掛住公司生存嘅問題，依家嘅壓力就係來自點樣保證公司安全咁成長。佢又話，咁多年來公司確有作出一些令人非議嘅決定，但能夠有一班志同道合嘅同事一齊做事（當年5個創辦人，有4個仍留喺騰訊），而且得到大眾嘅認同，係最難忘嘅事。
余絲韻