前任主席謝達峰○六年被廉署檢控後，謝太隨即加入董事局，仲喺去年接任主席，實行幫老公睇住盤生意。謝太被問到呢3年嚟嘅心路歷程時，坦言一年前接任主席都係戰戰兢兢，不過佢就同自己講，一定要幫屋企睇好盤家族生意，一定要贏，依家亦愈來愈有信心。

謝瑞麟拓內地市場

公司復牌股價升成兩倍，成為升幅榜第一位，佢話收到好多員工嘅短訊，覺得好鼓舞。雖然股價勁升，不過佢就明言公司會用心做好生意，唔會花心機「玩股價」，公司暫時亦無大規模融資計劃。

謝瑞麟之後嘅路向又會點呢？副主席兼行政總裁黃岳永就話，未來會着力發展中國市場，認為當地市場喺未來3至6年一定會成為世界最重要嘅消費市場，公司會發掘唔同嘅新商機，今年就計劃開10間以下嘅新店，每間投資額約500萬元人民幣，主要喺一線城市。受豬流感影響，五至六月訪港旅客數目跌幅達雙位數，令公司香港業務受影響，不過猶幸內地業務仍錄得單位數升幅。

余絲韻