成龍短片硬銷撐霸王

絲絲身邊唔少老友都好關心，究竟成龍大哥會唔會親身出席路演撐吓霸王，公司事前亦神神秘秘，只係話「到時你就知」。原來大哥佢因為工作太忙，所以就拍咗條短片畀公司喺推介會上播出，條片入面嘅佢依然坐喺度猛話霸王洗頭水好用又有效，叫投資者要有信心，令人諗起佢喺洗頭水廣告深入民心嘅演出，佢臨尾仲大派飛吻，呢一幕恐怕平時大哥嘅電影都唔係咁易見到。

361度廣告的士接貴客

好多人都想知成龍做霸王代言人，報酬係咪好高，據聞招股書無獨立披露，但霸王市場推廣費過億元，睇怕成龍大哥都分到一杯羹，至於歌后王菲筆數，就唔計入呢個年度嘅開支。

另一隻打對台嘅新股361度，為咗出奇制勝，營造青春活潑嘅氣氛，請咗兩名港男及人氣模特兒周秀娜亮相，佢哋仲有一招吸引投資者，就係幫投資者Call咗幾架有361度廣告嘅的士到酒店接送，絲絲聽講佢哋已喺250架的士賣廣告走勻全港九，顯見大家都深明廣告嘅重要性。

余絲韻