大市升穿19,000點回頭，短期再進行調整在所難免，上周三見啲股仔開始腳軟軟，但都企得吓，但適逢大市回吐，昨日尾市已見部分股仔頂唔順，出現回吐。市場資金輪流炒，如果啲大價嘢繼續偏軟，話唔定啲股仔又會再被翻炒都唔定。
雖然話尋日個市氣氛麻麻，不過都有個別板塊逆市炒上，好似早前勁炒過嘅新能源板塊，經過幾日來嘅消化，見啲沽壓消化得七七八八，昨日又發力再上，鑊鏟友不妨留意。
大市不穩，選股理當以穩健行先，美元貶值，內地未來以搶購資源作為國策，中信資源（01205）本身為中信集團之資源旗艦，經過多次收購後，資產急增，現時盈利已相當穩定，近期炒上後見高位整固，但仍能穩守20日線，此類資源股一旦守穩，隨時又會吸引基金埋位追貨，可於20日線水平作吸納，上望3元，止蝕位可放於2.1元。
古晨