本文重點
唔少代理行努力「省靚」公司招牌，都係想建立良好商譽，以獲得市場認同，Vincent啱啱收到美聯（01200）嘅好消息，該集團老友話，今個星期一係公司上市十四周年嘅大日子，咁啱在同日公司獲頒中國信譽企業認證獎項，由於雙喜臨門，所以集團主席黃建業在當晚就率領一眾高層管理人員出席頒獎禮，分享多年以來努力嘅成果。
黃主席話，公司不經不覺已成立三十六年，並喺九五年六月八日在香港上市，未來仍然會堅持「誠信領航」嘅企業文化。至於今次的二○○九年中國信譽企業認證，係由中國信譽企業品牌認證評審委員會，以及中華（海外）企業信譽協會所頒發，透過在全國不同地區、網上及表格投票，再經過專業分析及統計而出結果，今次得獎嘅內地及本港企業分別有23家及22家。
退休客一筆過買樓
銀行紅簿仔幾近無息收，令唔少資金流入樓市，Vincent聽中原老友話，以往一次過付款買樓嘅成交普遍都係一百萬嘅細樓，仲要多數係新界區，不過，最近有部分較貴價物業都出現類似情況，好似將軍澳新都城1期1座一個低層F室，就由一名退休人士「現兜兜」以195.5萬元買入，一毫子按揭都唔使做，認真豪氣，單位面積510方呎，呎價約3,833元。