本文重點
「君子不立危牆之下」，所以即使接受美國政府過千億援助嘅美國國際集團（AIG），大聲承諾會用10億美元作為挽留人才款項，但重賞之下亦無勇夫，AIG員工紛紛用腳「投票」，轉投小型保險公司，呢啲公司當然歡迎AIG員工加盟，因為可帶埋客戶過檔。
紛紛過檔益晒同行
去年AIG、XL及Hartford呢3間金融機構股價急挫七成，旗下保險代理人亦大量流失至同行Hanover及Navigators等保險集團。除咗基層保險代理人外，其實自去年九月美國政府注資幫助AIG起計，至今已有最少42名AIG經理級員工離開，過檔競爭對手Ace及蘇黎世財務，當中唔少係地區頭頭及部門主管，絕對係公司骨幹。
人力資源專家Paul Newsome話，打工仔當然關注自身飯碗，特別係任職於財政有問題公司嘅伙記，自然會尋找出路，所以睇到保險業內人士走來走去，絕對唔出奇！收納部分AIG伙記嘅XL發言人Trott話，公司一向廣納人才，旗下員工自動流失率無大變化。
商業保險公司FM Global商業保險部行政總裁Subramaniam坦言，喺商業保險領域，最貴重資產就係人才，如果喺一段時間之內有重要資產流失，有關公司嘅營運情況並唔容易復原。
余絲韻