過去一周，期指大挾空倉，不少大戶資金轉戰追大價股，炒到啲大藍籌半山咁高，叫啲散戶點追？還好大市萬九遇上阻力，大價股無得炒，熱錢轉戰細價股，結果一入市就炒到唔停得手，而且股仔愈升愈有，話晒股仔細細粒容易食，咁散戶先有機會入場搵吓真銀嘛。

古晨上周二有留意隻華藝銅業（00559），尾市突然大手掃上0.63元收市，收市後宣布以每股0.2元，配售3.16億股，佔擴大後股本五成，故翌日股價大插水，但跌至0.5元已有支持。計落咁大折讓配股，沽壓應該會好大，但過去幾日卻見股價穩步上升，走勢仲愈來愈靚，睇來幕後人已控制一切，昨日再度破頂，有勢可追，暫時先睇0.85元，而止蝕位可放於上次底部0.5元。

古晨