午後祖國魚缸跌勢放緩，深滬兩魚缸指數跌幅收窄，本地魚缸下半場收復部分失地，期貨場更大力抽升帶動下，恒指跌幅收窄至73點，報收18,502點；國企指數跌118點或1%，報收10,706點。現貨場成交額略為縮水至830億元，不過古勝相信，在市場資金仍極度充裕情況下，各地魚缸即使唔再勁升，亦跌極有限也！

港交所仍然係指標

大笨象（00005）跟祖國移動（00941）早段沽壓較大，前者最終收復失地，報收67.15元，微升0.45%。至於祖國移動，為了應付二奶電話（00762）所挑起的3G爭奪戰，計劃推出雙重補貼優惠，拖累其股價下跌至77元，散場報收78.35元，微跌0.38%。古勝一直強調，要知本地魚缸方向，住港交所（00388）無走雞，雖然早段魚缸低開，港交所亦曾低見122.8元，但下半場反彈力度驚人，散場報收127.3元，倒升一蚊雞。港交所唔死得，本地魚缸亦唔衰得去邊。

查實早段魚缸插水，淡友主要搵本地地主開刀，在下認為只要恒指唔穿17,600點，本地魚缸仍處於升勢，尤其日前萬九關前止步，萬九水平之上的恒指熊仔僥倖生存，大戶有冇咁好死，放過養熊仔淡友，古勝烏卜卜。或者係萬九點之上的熊仔，暫時未見太多散戶落疊，皆因18,500水平太過接近打靶位，若然指數落到17,800水平，有番過千點水位，方能吸引養熊淡友。古勝相信無論任何市況，切忌逆大勢而行，暫時唔敢做好友，亦咪做淡友。

股仔鑊鏟派對仍然熱鬧，今日古勝吼住中國澱粉（03838），昨日走勢見突破，逆市升7.3%，高收0.73元，加上成交增加，夠晒上升動力，呢轉有望破頂衝上一蚊雞。中國澱粉係中國三大玉米澱粉供應商之一，主要製銷玉米澱粉、賴氨酸、玉米製副產品及玉米深加工產品以及銷售電力和蒸氣。

今年盈利值得睇好

集團去年成績表開倒車，但今年玉米澱粉經營改善，原材料價格大降，煤價亦自去年第四季開始回落，有利減輕成本，最終有助提升中澱的毛利，今年份成績表大有改善。中澱去年收購多個項目，整體產能大為提高，○九年保守估計盈利可回升至1.6億元人仔，每股盈利6.1分人仔，折合港元6.9仙，預測市盈率10倍左右。睇番公仔圖表，中澱在0.45至0.55元水平橫行已久，經長時間收集後，以突破0.55元作起步位計，股價翻一番上1.1元，亦都唔算過分。

古勝