踏入六月第一個交易日，港股繼續向上，恒指最終收報18,888點，咁多個「發」字，望落去真係幾好意頭，不過攞彩的未必係一般普羅大眾，反而相信有心人，喺是次升浪真係唔慌唔發。
大市做好，尋日大部分股份都錄得不俗升幅。好似受惠汽油及柴油價格調高，一眾石油石化股就齊齊做好；至於上個禮拜已呈強勢的中資金融股，尋日亦繼續上揚。不過，若論全日升幅最勁的，就不得不提內房股，如走勢較落後的合生創展（00754），尋日更打入二十大升幅榜中。其實一句講到尾，大市咁強，都只因熱錢充斥着整個市場，既然如此，又何必同「錢流」對抗呢？大家倒不如順勢而為吧！
內地創業板上市的消息源源不絕，的確掀起一陣熱潮，尋日有內地消息就指，在蘭州就有五十家規模不大的牛肉麵店就擬組團衝擊創業板，仲表示第二年將吸納50家麵店。連麵店都咁熱衷於上市，相信及後創業板將可為內地市場帶來更多機遇。
（小尾）