本文重點
金魚缸走勢瞬息萬變，好多散戶都將外資大行分析員的報告奉為圭臬，希望可以靠聽取專家意見賺多少，之不過原來本港華資行中亦臥虎藏龍，有好多猛人。
金占士就識得一位華資證券行的前輩高人，睇大市走勢真是非常神準，仲好似天文台預測降雨量般，可以指出確切時間同目標值。
估見萬八時間準確
要證明個高人有幾勁，最近期的例子就要數到兩個月前，當恒指仍在14,000點左右上上落落之時，這位華資行高人就對金占士好肯定咁話，恒指六月前一定會上18,000點。由於當時市場氣氛仍未好轉，就連外資大行都睇得好保守，所以金占士對於這個樂觀預計都只係一笑置之，直至近排見到個市升升吓已經逼近19,000點關口，先後悔自己走寶。
金占士聽魚缸老友講，原來呢位高人以前已經多次估中大市走勢，老友鍾意用紅酒賭輸贏，他在過去兩、三年內，同人賭恒指上落竟然從未輸過，屋企仲多咗好多紅酒珍藏。其實好似這位華資行高人這樣的投資老手，可以作出準繩度如此之高的預測，背後全靠幾十年魚缸浮沉的經驗，正如大行報告都有好多數據同理論支持，散戶要跟風上車，事前都要做好功課，切忌盲目高追。
金占士